Та жирэмсэн үед ажил амралт, хоолны дэглэмийг сайн барьж өвчин эмгэгээс сэргийлэх нь чухал. Жирэмсний хугацаанд хэрэглэсэн ихэнх эмүүд нь эхийн цусаар дамжин урагт нөлөөлдөг учир өвчилсөн тохиолдолд заавал эмчид үзүүлж, зөвхөн эмчийн зааврын дагуу эм, тариа хэрэглээрэй.

Жирэмсэн үед биеэр эргэлдэх цусны хэмжээ ихэссэнээс хөлрөх, үтрээний ялгадас нэмэгдэх ба үүнийг дагаж та өөртөө тавих эрүүл ахуйн дэглэмээ сайжруулах ёстой. Өдөр бүр тогтмол усанд орж хөвөн даавуун эдээр хийсэн хувцас өмсөх, дотуур хувцсыг өдөр бүр солих нь зүйтэй.

Жирэмсэн байх хугацаандаа та харьяа дүүргийнхээ эмэгтэйчүүдийн кабинетэд юмуу, өрхийн эмчийн хяналтанд байх ёстой. Эмчийн байнгын хяналтанд байснаар хүүхдийн өсөлт зөв явагдаж байгаа эсэх, таны биед элдэв өвчин эмгэг байгаа эсэхийг эрт илрүүлэн хянаж, жирэмсний болон төрөлтийн хүндрэлээс сэргийлэх боломжтой болох юм.

Сар бүр, ойролцоогоор биений юмны мөчлөгийн дунд хугацаанд өндгөвчинд нэг буюу эсхүл маш ховор тохиолдолд хэд хэдэн өндгөн эс нь умайн үр дамжуулах хоолойгоор дамжин умайд орно. Өндгөвчнөөс гадагшилсны дараа эм бэлгийн эс 24 цагийн турш амьдрах чадвартай.